മദീന – മൊബൈൽ രീതിയിൽ വാഹനങ്ങൾ ഉപയോഗിച്ചുള്ള പാചക വാതക സിലിണ്ടർ വിതരണത്തിന് ഏതാനും നഗരസഭകൾ വിലക്കേർപ്പെടുത്തി. ഗ്യാസ് വിതരണ സ്ഥാപനങ്ങൾക്കകത്തു വെച്ചു മാത്രമേ സിലിണ്ടർ വിൽപന പാടുള്ളൂ എന്ന് നഗരസഭകൾ വ്യക്തമാക്കി. മൊബൈൽ രീതിയിൽ സിലിണ്ടർ വിൽപന ക്രമീകരിക്കുന്ന നിയമാവലി പ്രാബല്യത്തിലില്ലാത്തതാണ് ഈ രീതിയിലുള്ള ഗ്യാസ് വിൽപന വിലക്കാൻ നഗരസഭകൾ നിർബന്ധിതരായത്.
അതേസമയം വീടുകൾക്കും റെസ്റ്റോറന്റുകൾക്കും വാഹനങ്ങങ്ങളിൽ കറങ്ങി ഗ്യാസ് വിതരണം ചെയ്യരുതെന്ന് ഗ്യാസ് വിൽപന മേഖലയിൽ പ്രവർത്തിക്കുന്ന സ്ഥാപനങ്ങളോട് മദീന നഗരസഭ ആവശ്യപ്പെട്ടു. മൊബൈൽ രീതിയിൽ സിലിണ്ടർ വിതരണത്തിന് മദീന നഗരസഭ ലൈസൻസ് അനുവദിക്കുന്നില്ല. ഈ രീതിയിലുള്ള ഗ്യാസ് വിതരണം ക്രമീകരിക്കുന്ന നിയമാലിയും പ്രാബല്യത്തിലില്ലാത്തതുകൊണ്ട് തന്നെ മൊബൈൽ ഗ്യാസ് വിതരണം ഒരുനിലക്കും അനുവദിക്കാനാകില്ലെന്നും മദീന നഗരസഭ പറഞ്ഞു.