റിയാദ്: സൗദി അറേബ്യയുടെ മാനവ വിഭവശേഷി കുതിപ്പില് നിര്ണ്ണായക പങ്ക് വഹിച്ച ലുലു ഗ്രൂപ്പിനെ ആദരിച്ച് മാനവ വിഭവശേഷി- സാമൂഹിക വികസന മന്ത്രാലയം. സാമൂഹിക സുരക്ഷ ഗുണഭോക്താക്കളുടെ ശാക്തീകരണ ഫോറത്തിന്റെ സമാപന ചടങ്ങിലാണ് ലുലൂ ഹൈപ്പർമാർക്കറ്റിനെ മന്ത്രാലയം പ്രധാന വിജയശില്പിയായി ഔദ്യോഗികമായി ആദരിച്ചത്.
ചടങ്ങില് മാനവ വിഭവശേഷി, സാമൂഹിക വികസന മന്ത്രാലയത്തിലെ സോഷ്യൽ ഡെവലപ്മെന്റ് ഡെപ്യൂട്ടി മിനിസ്റ്റർ ഹിസ് എക്സലൻസി ബദർ ബിൻ ഇബ്രാഹിം അൽ-സുവൈലമില് നിന്ന് ലുലൂ സൗദി അറേബ്യ ഡയറക്ടർ മുഹമ്മദ് ഹാരിസ് , ലുലൂ ഹൈപ്പർമാർക്കറ്റ്സ് എച്ച്.ആർ & ലീഗൽ അഫയേഴ്സ് ജനറൽ മാനേജർ അബ്ദുള്ള ഹമദ് അൽ ഖബ്ബാബിനാഹ് എന്നിവർ ചേർന്ന് പുരസ്കാരം ഏറ്റുവാങ്ങി.
മാനവ വിഭവശേഷി മന്ത്രാലയത്തിന്റെ ആഭിമുഖ്യത്തിൽ നടന്ന ചടങ്ങിൽ, രാജ്യത്തിന്റെ വിവിധ മേഖലകളിലായി നടപ്പിലാക്കിയ ദേശീയ വികസന പദ്ധതികളെ ആദരിച്ചു. സാമൂഹിക സുരക്ഷ പദ്ധതിക്ക് കീഴില് തൊഴിലവസരങ്ങൾ വർദ്ധിപ്പിക്കുന്നതിനും, തൊഴിലധിഷ്ഠിത പരിശീലനം നൽകുന്നതിനും, അവരെ ദീർഘകാല സ്വയംപര്യാപ്തതയിലേക്ക് നയിക്കുന്നതിനും ഈ പദ്ധതികളിലൂടെ സാധിച്ചൂ എന്ന് മന്ത്രാലയം വിലയിരുത്തി.
ഈ സുപ്രധാന നേട്ടം ഏറെ അഭിമാനം നല്കുന്നതെന്ന് ലുലു സൗദി അറേബ്യ ഡയറക്ടർ മുഹമ്മദ് ഹാരിസ് പ്രതികരിച്ചു. സൗദി അറേബ്യയിലുടനീളം സുസ്ഥിരമായ തൊഴിലവസരങ്ങൾ സൃഷ്ടിക്കുന്നതിൽ പൊതു-സ്വകാര്യ പങ്കാളിത്തത്തിന്റെ ശക്തി വെളിപ്പെടുത്തുന്നതാണ് ഈ അംഗീകാരം. സാമൂഹിക പ്രതിബദ്ധതയുള്ള പ്രവർത്തനങ്ങള് ഓരോന്നും സൗദി വിഷൻ 2030-ന് അനുസൃതമായാണ് ലുലൂ ഹൈപ്പർമാർക്കറ്റ് മുന്നോട്ട് കൊണ്ടുപോകുന്നത്. ദേശീയ സമ്പദ്വ്യവസ്ഥയിൽ സജീവ പങ്കാളികളാന് ഓരോരുത്തരേയും സഹായിക്കുന്ന സമഗ്രമായ അവസരങ്ങൾ ഒരുക്കാൻ ലുലൂ പ്രതിജ്ഞാബദ്ധരാണെന്നും അദ്ദേഹം വ്യക്തമാക്കി.
