റിയാദ്: റിയാദിന്റെ വടക്കുകിഴക്കായി സ്ഥിതിചെയ്യുന്ന പ്രദേശത്തിനായുള്ള പ്രാരംഭ മാസ്റ്റർ പ്ലാൻ തയ്യാറായി. റിയാദ് സിറ്റി റോയൽ കമ്മീഷനാണ് ഇക്കാര്യം അറിയിച്ചത്. കിങ് ഖാലിദ് അന്താരാഷ്ട്ര വിമാനത്താവളം, വാദി അൽസുലൈ, ദമ്മാം, ജനാദ്രിയ റോഡുകൾ എന്നിവ ബന്ധിപ്പിക്കുന്നതാണ് പദ്ധതി. പദ്ധതി നടപ്പാക്കുക ഏകദേശം 456 ചതുരശ്ര കിലോമീറ്റർ വിസ്തൃതിയിലാണ്. പദ്ധതിയുടെ പ്രാരംഭ ഘട്ടം ആരംഭിച്ചു.
റിയാദിലെ ഏറ്റവും വലിയ ഭാവി നഗര വികസനമാണിതെന്നും അധികൃതർ പറഞ്ഞു. മേഖലയിലെ ഭൂ വിനിയോഗത്തിനുള്ള പൊതു കാഴ്ചപ്പാടാണ് പദ്ധതി. ഘട്ടംഘട്ടമായുള്ള വിപുലീകരണം സാധ്യമാക്കുന്ന ദീർഘകാല നഗര മാതൃക കെട്ടിപ്പടുക്കുക, പാർപ്പിടവും ദൈനംദിന സേവനങ്ങളും സംയോജിപ്പിക്കുന്ന സമഗ്ര ജനവാസ കേന്ദ്രങ്ങൾ രൂപകൽപ്പന ചെയ്യുക, പാർപ്പിട-സാമ്പത്തിക-വിനോദ-പ്രകൃതിദത്ത മേഖലകൾ തമ്മിലുള്ള സന്തുലിതാവസ്ഥ ഉറപ്പാക്കുക തുടങ്ങിയവ അടിസ്ഥാനമാക്കിയാണ് പദ്ധതി.
