റിയാദ്: ആവശ്യമായ ലൈസൻസില്ലാതെ പ്രൊഫഷണൽ സേവനങ്ങൾ പരസ്യം ചെയ്യുന്ന ഒരു വാണിജ്യ സ്ഥാപനത്തിനെതിരെ നടപടിയുമായി സൗദി അറേബ്യ. സൗദി ഓർഗനൈസേഷൻ ഫോർ ചാർട്ടേഡ് ആൻഡ് പ്രൊഫഷണൽ അക്കൗണ്ടന്റ്സ് ആണ് നിയമലംഘനം കണ്ടെത്തിയത്. ആവശ്യമായ നിയമ നടപടികൾ സ്വീകരിച്ച ശേഷം കേസ് പബ്ലിക് പ്രോസിക്യൂഷന് കൈമാറി.
സ്ഥാപനം, ആവശ്യമായ ലൈസൻസ് നേടാതെ സ്ഥാപനത്തിന്റെ മേൽനോട്ടത്തിൽ വരുന്ന പ്രൊഫഷണൽ സേവനങ്ങളുടെ പരസ്യം വെബ്സൈറ്റിൽ നൽകിയിട്ടുണ്ടെന്ന് പ്രാഥമിക പരിശോധനയിലും തെളിവ് ശേഖരണ നടപടിക്രമങ്ങളിലും കണ്ടെത്തിയതായി അധികൃതർ ചൂണ്ടിക്കാട്ടി. ഇത്തരം നടപടികൾ അക്കൗണ്ടിംഗ് ആൻഡ് ഓഡിറ്റിംഗ് പ്രൊഫഷന്റെ നിയമത്തിലെ ആർട്ടിക്കിൾ 10 പ്രകാരമുള്ള കുറ്റകൃത്യങ്ങളാണെന്ന് അധികൃതർ വ്യക്തമാക്കി. തൊഴിലിന്റെ സമഗ്രതയെ അപകടപ്പെടുത്തുന്നതോ പൊതുജനങ്ങളെ തെറ്റിദ്ധരിപ്പിക്കുന്നതോ ആയ നടപടികൾക്കെതിരെ നിയമനടപടി സ്വീകരിക്കുമെന്നാണ് അധികൃതർ നൽകുന്ന മുന്നറിയിപ്പ്.
