റിയാദ്: സൗദിയിലെ മിക്ക പ്രദേശങ്ങളിലും ശനിയാഴ്ച വരെ ഇടിമിന്നലോട് കൂടിയ മഴ തുടരുമെന്ന് മുന്നറിയിപ്പ് നൽകി സിവിൽ ഡിഫൻസ്. പൊതുജനങ്ങൾക്ക് അധികൃതർ ജാഗ്രതാ നിർദ്ദേശവും നൽകിയിട്ടുണ്ട്. സുരക്ഷിതമായ സ്ഥലങ്ങളിൽ തുടരാണമെന്നും താഴ്‌വരകളും വെള്ളപ്പൊക്കത്തിന് സാധ്യതയുള്ള പ്രദേശങ്ങളും സന്ദർശിക്കുന്നത് ഒഴിവാക്കണമെന്നും അത്തരം പ്രദേശങ്ങളിൽ നീന്തുന്നത് ഒഴിവാക്കണമെന്നും അധികൃതർ നിർദ്ദേശിച്ചു.
വിവിധ മാധ്യമങ്ങളിലൂടെയും സോഷ്യൽ മീഡിയ പ്ലാറ്റ്‌ഫോമുകളിലൂടെയും നൽകുന്ന നിർദ്ദേശങ്ങൾ പാലിക്കാനും ഡയറക്ടറേറ്റ് അഭ്യർത്ഥിച്ചു. മക്ക മേഖലയിൽ മിതമായതോ കനത്തതോ ആയ മഴ ലഭിക്കുമെന്നും വെള്ളപ്പൊക്കം, ആലിപ്പഴം, പൊടിക്കാറ്റ് എന്നിവ ഉണ്ടാകുമെന്നും ദേശീയ കാലാവസ്ഥാ കേന്ദ്രം പ്രവചിക്കുന്നു. മക്ക, അൽ-കാമിൽ, അൽ-ജുമും, ബഹ്റ, തായിഫ്, മെയ്സാൻ, അദ്ഹാം, അൽ-അർദിയത്ത് എന്നിവ ബാധിത പ്രദേശങ്ങളിൽ ഉൾപ്പെടുന്നു.
