ജിദ്ദ: ആപ്ലിക്കേഷനുകൾ വഴി ടാക്‌സി നിരക്കുകൾ അവലോകനം ചെയ്യുന്നതിനുള്ള പുതിയ സംവിധാനം ഏർപ്പെടുത്താൻ സൗദി അറേബ്യ. രാജ്യത്ത് പൊതുഗതാഗതം ഉപയോഗിക്കുന്നതിനുള്ള നിരക്കുകൾ നിശ്ചയിക്കുന്നതിനുള്ള നയത്തിന്റെ ആറാം അധ്യായത്തിലെ ഖണ്ഡിക 30 ഭേദഗതി ചെയ്യാനുള്ള തീരുമാനം ഗതാഗത, ലോജിസ്റ്റിക്‌സ് മന്ത്രി സലേഹ് അൽ-ജാസർ പുറപ്പെടുവിച്ചു.
ടാക്‌സി മേഖലയിൽ യാത്രക്കാരും ഓപ്പറേറ്റർമാരും തമ്മിൽ മെച്ചപ്പെട്ട സന്തുലിതാവസ്ഥ കൈവരിക്കുന്നതിനാണ് പദ്ധതി ലക്ഷ്യമിടുന്നത്. പുതിയ ഭേദഗതികൾക്ക് കീഴിൽ, ട്രാൻസ്പോർട്ട് ജനറൽ അതോറിറ്റി നിർദ്ദേശിച്ച നിരക്കുകൾ അംഗീകരിക്കുന്നതിന് ‘അവലോകനം – അംഗീകാരം’ അടിസ്ഥാനമാക്കിയുള്ള ഒരു രീതി വികസിപ്പിച്ചെടുത്തിട്ടുണ്ട്. അതിലൂടെ ടാക്‌സി സർവീസ് നിരക്ക് നിർദ്ദേശങ്ങൾ തയാറാക്കി ഗതാഗത, ലോജിസ്റ്റിക്‌സ് മന്ത്രിക്ക് അംഗീകാരത്തിനായി സമർപ്പിക്കും. ഇലക്ട്രോണിക് ആപ്ലിക്കേഷനുകൾ വഴി ടാക്‌സി സർവീസ് നിരക്കുകൾ നിർണ്ണയിക്കുന്നതിനുള്ള സമാനമായ സംവിധാനം ഇതിൽ ഉൾപ്പെടുന്നുണ്ട്.
